Jetzt bin ich scho mehr als ä Wuche in dr Schwiiz und d'Wiehnacht stoht vor dr Tür. Ich ha no gar kei Ziit gha, ä Itrag z'schriebe. Ich ha ä wunderschöni Wuche gha und vieli Fründe und d'Familie chönne gniesse. Ehrlich gseit, bin ich ä bitz uf de Wegge, will ich doch jede Tag mind. öber troffe ha, nebe all de Arzttermine. Aber jetzt han ich dr Bewies, dass ich gsund bi :-)! Mi Schweschter mit dr Familie isch au no us em Usland cho und mir verbringe Wiehnachte dieses Joor wieder ä mol zäme, leider het dr Fabrizio nit chönne cho. Er isch in Jordanie bliebe, er isch iglade worde und isch so nit allei. Danke vielmol P.S., do bin ich froh.
Ich ha au mini Ichäuf tätigt, jetzt muess ich denn nur ä mol no luege, wie schwer dr Koffer wird.... ;-)! Hoff nit meh als 20 kg! Gschenkli sin au alli ipackt und ich freu mi riesig die alli z'verteile. Dr Wiehnachtsbaum hän mir hüt au ufgstellt und au scho gschmückt. Das Joor isch er nit so gross und leider au ä chli chrumm - gäll Papi! Mir hoffe jetzt alli, dass er vorallem stoh bliebt, er isch nämlich scho fascht umgheit, er het ä chli Schlagsite gha!
So, ich wird euch denn no brichte was für Gschenkli ich becho ha und öb vorallem alles im Koffer Platz gha het ;-)!
Ich wünsch euch allne ä schöni Wiehnachte wo immer dir au sit.
Keine Kommentare:
Kommentar veröffentlichen