Wo ich vorher mich igloggt ha, han ich mit Schrecke feschtgstellt, dass es scho fascht ä Monet her isch, dass ich in Blogg gschriebe ha, uppsss! Tjä, ich muess ehrlich säge, dass ich in de letschte Wuche nit wirklich d'Musse und d'Ziit gha ha öbis inne z'schriebe.
Aso ich hänkt eifach grad am letschte Blog ah, ich bi denn wirklich früeh ins Bett gange und dr Fritig isch denn au ziemli schnell verbi gange, will mir au mit emene befründete amerikanisch Ehepaar sind go z'mörgele! Isch mega fein gsi, mir sin im Blue Fig gsi (die wo dr Blog regelmässig lese wüsse, dass mir dort scho mehrmols sin go z'Nacht esse). Ich muess säge au s'morge cha meh bruche. Es git nit Continental Breakfast, sondern "iheimischi Sache" wie Manqoush zum Bispiel. Was mir au gno hän. Kurz gseit isch es ä Stück Teig mit verschiedene Beleg druf (z.B. Labneh mit Honig, Thymianpaschte oder Lachs). Het usgezeichnet gschmeckt. Denn sin mir afangs Nommitag hei cho und hän no die letschte Vorbereitige troffe und sind denn eifach no chli gsi! Denn nach em z'Nacht hän mir uns uf ä Weg gmacht an Flughafe. Ich find's immerwieder luschtig, die Situation am Flughafe z'beobachte während dem das ich wart bis d'Lüt us em Usgang use chöme. Dieses Mol bin ich jo nit ällei gsi, dr Fabrizio isch mitcho! Isch interessant gsi, es het viel weniger neugirigi Blick geh als sünscht, wenn ich ällei dört stand ;-)! hi hi!
Wo mis Cousinli N. und dr R. denn endlich usecho sin, hän mir uns wie chlini Chinder gfreut. Es isch jedesmol wieder schön öber vo dähei chönne in d'Arme schliesse (die wo scho do gsi sin: ich weiss, keini Zärtlichkeite in dr Öffentlichkeit, aber zwische gliche Gschlecht isch's ok.)!
Die Wuche mit dr N. und em R. isch so schnell verbi gange und mir hän ä mega Ziit zäme verbrocht, hän viel glache und au sehr viel erledigt. Hey, dir zwei nomol tusig Dank für euri Hilf mit euser Dachterrasse, wenn dr R. nit gsi wär, wär ich glaub hüt no dra die einti Pflanze us em Fass use z'chnüble...(meh drzue gli). S'Wetter het au passt, nit 1 Tag Rege, drfür Sunne und jede Tag ä chli wärmer. So hän mir denn doch fascht jede Tag es chliners oder grössers Usflügli gmacht. Unteranderem ans Tote Meer, Petra, Iraq al-Amir, Amman, natürlich het's dr N. und mir sogar glängt go ä chli go shoppe.... Leider isch dä Usflug nit wirklich erfolgrich gsi! :-(! Denn isch aber au scho dä Tag vom Abschied cho..... mir häns jo scho oft erwähnt, es fallt eim gar nit licht und wo dr Fabrizio und ich denn wieder dähei in dr Chuchi ghockt sin und z'mörgelet hän, isch wieder das unagenehme Gfühl vo Heiweh nach de Fründe und Familie ufcho...!
Am andere Tag isch denn au scho wieder dr Alltag losgange und ich ha mi denn dra gmacht wieder ä mol ä chli d'Wohnig z'ordne. Dummerwis bin ich denn bim putze vom Gäschtebad an die glasigi Duschwand cho, die isch irgendwie zersprunge und ich ha d'Glasscherbe (zum Glück isches Sicherheitsglas gsi) uf em Chopf und im T-shirt gha. :-)! Denn han ich ä mol z'erscht die Scherbe weggrumt und denn grad dr Versicherig aglüte. Ihr chönnet euch's jo vorstelle, nach 2 Tag han ich denn Bscheid becho, dass dä Schade nit deckt sig.... Mmmmhhh irgendwie chunnt mir die Gschicht doch bekannt vor....! Ich ha denn zimli hässigi Mails gschriebe und nachere Wuche ha ich denn es Tel. vom Versicherigsvertreter becho. Er het an dem Tag wellä verbi cho, hej jo, ich wart jo nur dähei damit er cha verbi cho.... Ich bi aber uf em Weg nach Petra gsi, will unterdesse isch scho dr nexscht hohi Bsuech cho. Ich ha mit ihm veribart, dass ich mich nach Dubai meld, damit mir ä Termin chönne abmache. jep dir heit richtig glese, eigentlich wäre mir die Wueche wieder ä mol in Dubai, aber do drzue meh in Chürzi. Z'erscht no ä churzi Info zum 2. Bsuech vo däm Joor. Mi allerbeschti Fründin N. isch uns cho bsueche und ich ha denn no au mis Geburigschenkli becho, so wunderschön gsi! An dere Stell nomol merci merci merci N.! N. isch am Samschtigobe a cho und do si am nexschte Fritigmorge früeh wieder hei isch, hän mir ziemli schnell müesse uns uf dr neuschti Stand vo Tratsch und Klatsch bringe und vorallem isch au es gedrängts Programm agstande ;-)! Also, Sunntig han ich ganz viel chlini Sache no in dr Stadt zum erledige gha, isch grad super gsi, will so het N. grad ä chli vo Amman gseh und gmerkt was ich so dr ganz Tag mach und wo mir däheime sin. Mir hän au no muesse dr Koffer packe wills ab in Süde gange isch, dr Mentig hän mir am Tote Meer verbrocht und hän so recht viel Ziit gha uns alles z'verzellä was so gloffe isch und mir erlebt hän. Frog mi hüt no was d'Nochbere am Strand echt dänkt hän..."oh mann 2 so Schnäddertantene... ;-)!" Denn Mitti Nommitag sind mir denn witer Richtig Süde am Tote Meer entlang gfahre und genau zum Sunneuntergang sin mir in dr Feynan Lodge acho. Wow, chan ich do nume säge und ich chas aso wirklich empfehle. Mir hän denn gli ä mol z'Nacht becho und nach em Esse hän mir uns denn uf s'Dach begeh und hän uns dört uf d'Matte gleit und dr Sternehimmel bestunt. So viel Sterne han ich s'letscht mol in Kanada bim W. und D. gseh! Unglaublich schön! Ich ha 4 Sternschnuppe gseh (chleini Randbemerkig, mir hän's Zimmer Nr. 4 gha ;-), gäll N.?! hi hi! Und dos dört so ruhig isch und vorallem dunkel sin mir ziemli gli ufs Zimmer und hän gschlofe. Vorallem au dorum will mir am 4.45 hän dörfe ufstoh do mir d'Sunneufgang-Wanderig hän gmacht. Isch richtig gigantisch gsi, obwohl mir es paar Minute z'spot cho sin (wege mir..... dr Guide isch für mich leider ä chli z'schnell dr Berg ufsprunge und churz vor em Gipfel het denn leider mi Lunge verseit, ich has zum Glück frühgnuh gmerkt und so han ich muesse ä Pause mache)! Die Ussicht und das Liechtspiel isch genial gsi, chan ich aso wärmschtens empfehle! Denn het's nach em Abstieg z'morge geh und mir hän uns denn no ufemene Spaziergang im ustrochnete Flussbett entlang d'Ziit vertriebe bevor mir wieder Richtig Amman zrugg sin. Am Mittwuch het's denn wieder gheisse früeh ufstoh, will Petra uf em Plan gstande isch. Obwohl ich jo scho dört gsi bi, han ich dieses Mol au no öbis Neus gseh, es git dört ca. 850 Stuefe wo in Stei gmeisslet sin, wo meh cha ufgoh und d'Ussicht gniesse! Ich säg nuemme WOW! Wieder unde acho, hän mir scho bald wieder retour muesse will dr Buss gfahre isch. Kaputt und glücklich sind mir denn churz vor 8ti in Amman acho. Dr Donnschtig isch denn leider scho unse letschte Tag gsi, hän no letschti Ichäuf gmacht und hän uns no Iraq al-Amir alguegt. Denn sin mir no schnell an d'Rainbow-Street und sin dört imene wunderschöne Restaurant go libanesisch go esse. Denn het's gli scho gheisse Koffer packe, nomol esse ;-)! Und denn isch denn au scho Ziit gsi zum an Flughafe z'fahre.... :-(((! Ich erwähns jetzt do nüm, aber es git so viel schöners uf dere Welt als das....!
Eigentlich hätte mir denn am Fritigmorge nach Dubai müesste fliege, aber s'Training vom Fabrizio isch abgseit gsi und mir sin in Amman bliebe. Ich weiss es isch nit wirklich interessant über s'Wetter z'lese, aber es isch bis jetzt so luschtig gsi, immer wenn Bsuech do gsi isch, isch s'Wetter guet gsi (Sunne, warmi Temperature dure Tag, usw.) chum isch dr Bsuech weg, isch es wieder chalt worde, Nebel, Rege und und und... wohrschinlich het sich s'Wetter eusne Gmüetszuständ apasst! :-)! Die Wuche isch schnell verzellt... Es het jede Tag gregnet bis uf hüt, ich bi sit am Samschtig krank, hüt isch dr 1. Tag wo ich wieder ä mol ufbi und einigermasse fit bi. Hoff das goht so witer, do mir am Samschtig nach Ajloun wän und ä chlineri Wanderig mit Sightseeing wän mache, also Dumme drucke!
Ach übrigens, mir warte immerno uf dr Typ, wo uns sötti cho ä Offerte für d'Reparatur mache, mir häns bis hüt noni gschafft, dass er verbi chunnt und sich das ganze aluegt.... no comment!
Do no es paar Föteli vo eusne Usflüeg und vo eusere Dachterrasse:
Keine Kommentare:
Kommentar veröffentlichen